Aai Thi Ik Sadaa Si Magar Yaad Ab Nahin

Shahzad Malik

Aai thi ik sadaa si magar yaad ab nahin
Auron sey thi juda si magar yaad ab nahin


Tehreer oske chehrey pe ik ajnabi si thi
Aankhein thin aashna si magar yaad ab nahin


Tark-e-taluqat ka jo ban gai sabab
Woh baat thi zara si magar yaad ab nahin


Ankhon ki khushk jheel mein utrey tou ye khula
Thi rouh kitni piyasi magar yaad ab nahin


Kuch yaad Aa raha hai ke Aaghaz-e-hijar mein
Chhai tou thi udasi magar yaad ab nahin


Kuch osko daiyr ho gai aanay mein aur kuch
Thi umer bewafa si magar yaad ab nahin...!!

Posted in: ,